Einn ágætis dag ætlaði ég ásamt félögum mínum að mæta til veiða í Stóru Laxá svæði I og II. Við höfðum tekið allar stangirnar 4 í tvo daga. Gott veður var og fiskur í ánni skv. síðustu veiðimönnum og útlit því virkilega gott. Þegar haldið var til veiða fyrsta dag komum við að tveimur kæjökum á leið niður ánna ásamt tveimur bílum sem lagt höfðu að Brúarhyl. Við töluðum við fólkið og komumst að því að annar siglingameistaranna á leið niður ánna var landeigandi að ánni en engu að síður sigldi hann sínu fleyi niður ánna á meðan veiðitíma stóð. Við veiðifélagarnir vorum virkilega óánægðir með þetta en héldum ótrauðir áfram til veiða. En því miður þá var þetta bara byrjunin á miður skemmtilegum veruleika veiðimannsins. Allan veiðitímann vorum við að kljást við fólk sem syndandi var í hyljum árinnar ásamt tíðum kæjakferðum niður ánna. Við vorum í leik veiðivarðar sem hvergi var sjáanlegur reynandi að flæma burtu fólk af veiðistöðum sem við höfðum eytt góðum tíma og pening í að fá að njóta í nátturunni einni saman. Hámarki náðu þó þessi leiðindi þegar seinni helmingur annars dags stóð yfir þá höfðu "steratröll" komið sér fyrir í einum hyl árinnar og vildu sig ekkert hreyfa. Þarna slógum við endalokin í að leika veiðiverði og þurftum einfaldlega að leggja stöngum okkar og hætta veiði. Þessi veiðiferð var í algjörum molum enda ekki hægt að veiða hylji þar sem berir rassar ásamt kjölum kæjaka gára vatnið og rista botna.

Við höfðum samband við Stangveiðifélagið um þetta mál og var okkur tjáð að þetta myndi fara fyrir stjórnina þar á bæ. Síðar er haft samband við einn af okkur og okkur sagt að Svfr væri ekkert skaðabótaskylt fyrir svona löguðu. Sá sem hringdi fyrir hönd Svfr var þá tjáð að þeir hefðu vissa vöru til sölu og hún hefði nú verið stórlega gölluð í þetta skiptið. Þá breyttist andrúmsloftið og okkur var boðin ein stöng i einn dag seinna í ánni allt og sumt. Þetta símtal var ekki einu sinni á afsökunarnótunum þar sem leiðinleg skylda talsmanns Svfr var að tjá okkur þessi tíðindi.

Það er ótrúlegt að Veiðileyfasalar hér á landi geti komist upp með svona lagað. Ég verð að segja fyrir mitt leyti að ég hef aldrei lent í öðru eins fyrir utan kannski einn mann buslandi í einum hyl í þeirri á sem ég hef veitt í, eða krakkar í Elliðaánnum að leik. Þetta er ekki einu sinni sambærilegt þar sem fólk var í hyljum árinnar öllum stundum. Þetta raskaði okkar veiðitíma gríðarlega og í sárabætur þá eiga tveir af okkur að fá að njóta sín á kostnað hinna sex veiðandi í einn dag sem sárabætur fyrir svona veiðiferð.

Veiðimenn ég skora á ykkur að svara þessum pistli og lýsa ykkar skoðun á honum. Mér þykir þetta háborin skömm fyrir samtök sem segjast vera hagsmunasamtök veiðimannsins. Mín uppsögn kemur í kjölfarið á þessum viðbrögðum talsmanns Svfr ásamt uppsögnum frá öðrum veiðifélögum mínum.